Canzone di Giulio Cesare Cortese

Le figliole che n’hanno Ammore,
Songo nave senza la vela
So’ lanterne senza cannela
Songo cuorpo senza lo core
Le figliole che n’hanno Ammore.

Le figliole che n’hanno amante,
So’ comm’arvole senza frutte
So’ terrene sicche ed asciutte,
Che non fanno sciure ne chiante
Le figliole che n’hanno amante.

Le figliole che n’hanno amice,
Sanno poco che cos’è bene
Quanno po’ la vecchiezza vene
S’asciarranno triste e nfelice
Le figliole che n’hanno amice.

Zetellucce belle e cianciose
Mo gostate, che tiempo avite
Mo che tennere e fresche site
Tiempo è cogliere mo le rose
Zetellucce belle e cianciose.